Университет 4.0: университет ғылымы алдындағы мәселелер

12 сәуір күні AlmaU ұжымы дәстүрлі түрде Ғылым қызметкерлері күнін атап өтті. Тарихқа көз жүгіртсек, бұл мереке академик және Қазақ КСР Ғылым Академиясының тұңғыш Президенті Қ.И. Сәтбаевтың туған күніне орайластырылған.

Атаулы күні Aлматы Менеджмент университетінде ғылыми топпен университет ғылымының қазіргі жағдайы, міндеттері мен даму болашағы туралы «Университет 4.0: университет ғылымы алдындағы мәселелер» тақырыбында талқылау өтті.

Диалог алаңында еліміздегі ғылым саласының өзекті мәселелері көтеріліп, ғалымдардың мәртебесін көтеру және оларды әлеуметтік тұрғыдан қамтамасыз ету шараларын күшейту керегі айтылды.

Спикерлердің қатарында құттықтауларға ҚР Ғылым және жоғары білім министрлігінің Ғылым комитетіне қарасты Экономика институты директорының ғылым жөніндегі орынбасары, PhD Әлібекова Гүлназ Жанатқызы қосылып, тақырып аясында сөз өрбітті. Ол өз сөзінде студенттердің ғылыми-зерттеу құзіреттілігін қалыптастырудың, педагогикалық ұжым мен студенттерді ғылыми-зерттеу қызметіне тартудың тиімді үлгілерін табудың маңыздылығына тоқталды.

Ғылым жөніндегі проректор Сәркеев Бақытжан Құрманбайұлы университет ұжымын ғылым күнімен құттықтап, оқу үдерісінде ғылыми зерттеулер мен жобаларды жандандыру қажеттігін атап өтті.

Шара соңында AlmaU ғылымының дамуына және ғылыми қызметкерлерді даярлауға үлес қосқан профессор-оқытушылар құрамы мен қызметкерлері университет ректоры атынан Құрмет грамоталарымен марапатталды.