AlmaU командасы робототехника бойынша Бірінші Республикалық «IITU Robocon 2019» олимпиадасының жеңімпазы атанды

Алматы қаласында 2019 жылдың 15 ақпанында  "IITU Robocon 2019" робот техникасы бойынша бірінші республикалық чемпионат өтті. Чемпионат Жастар жылын қолдау аясында ұйымдастырылды.

Жарыс "Halyk Arena" мұз сарайының алаңында өтті. Олимпиада "Сандық Қазақстан" және "Рухани жаңғыру" бағдарламаларын дамыту аясында ұйымдастырылып, оған еліміздің 15 үздік студенттік командасы қатысты. "IITU Robocon 2019" бірінші ірі ел чемпионатының басты ұйымдастырушылары -Қазақстан Республикасының Тұңғыш Президенті – Елбасы Қоры және Халықаралық ақпараттық технологиялар университеті  болды.

Чемпионатты өткізудің басты мақсаты жастарды еліміздің инновациялық қызметін дамытуға және техникалық салада ауқымды және заманауи білім алу арқылы жаңа стартап жобаларды іске асыру жұмыстарына қатысуға тарту болып табылады.

Чемпионаттың финалында 3 жүлделі орын болды:

Бірінші орынды Almaty Management University командасы жеңіп алды.

Екінші орын әл-Фараби атындағы Қазақ ұлттық университетіне берілді.

Үшінші орынды Радиоэлектроника және байланыс әскери-инженерлік институты иеленді.

Сыйлық ретінде жеңімпаздар мен жүлдегерлерге 3D принтерлер, квадрокоптерлер мен ноутбуктар тапсырылды. Чемпионатты ұйымдастырушыларға үлкен алғысымызды білдіреміз. Бұл іс-шара студенттер үшін өз қабілеттерін көрсетуге ықпал етеді және Қазақстанның инновациялық технологияларын дамытуда өз үлестерін қосуға тамаша мүмкіндік болып табылады!