AlmaU «Алматы-Марафонға» қатысты

22 сәуір күні Алматы қаласында жыл сайынғы "Алматы-Марафон" өтті. Бүкіл қала тұрғындары мен қонақтарын қамтитын ауқымды жобаға Алматы Менеджмент Университеті де белсене қатысты.

AlmaU президенті Асылбек Қожахметов марафонда 21 км қашықтыққа жүгіріп, университет студенттері, оқытушылары мен қызметкерлерінен құралған топты бастады. Мәреге жеткен AlmaU-лықтарды қолдаушылар дауыстап, университет туын көкке көтеріп қарсы алды.

«Алматы-Марафонға» Алматы Менеджмент Университеті жыл сайын үлкен топ болып қатысады. Аталмыш спорттық іс-шараны келесі жылы Университеттің 30-жылдық мерейтойына орай жоғары деңгейде ұйымдастыру жоспарлануда.

Салтанат Шоланова, AlmaU PR-орталығының бас маманы, марафондағы AlmaU жанкүйері:

«Алматы-Марафон» қаламыздың ауызбіршілігін нығайтатын ауқымды іс-шара. Сондықтан біздің ұжым үшін марафонға қатысу – үлкен бақыт. Студенттермен бірге ән айтып, би билеп, қатысушыларды қолдап қарсы алу біздің топтық рухымызды одан әрі нығайтады деп сенемін. Сонымен қатар, жүгіру – салауатты өмір салтының бастауы болғандықтан, студенттеріміздің бойында спортқа деген махаббатты ояту да біз үшін маңызды. Оған қоса, он бес мың адам жиналып, жүгіретін марафонда келесі жылы да қатысуға шабыттанатындар көп. Сондықтан қызықтың ортасында болып, марафонға қатысқаныма қуаныштымын!