АЛМАТЫ ҚАЛАСЫНДА «ALMA CUP 2022» ЧЕМПИОНАТЫ БАСТАЛДЫ
2022 жылдың 8 желтоқсаны «Достық» әмбебап спорт кешенінде чемпионаттың ашылу салтанаты өтті. Ашылу салтанатында төрешілер мен командаларды таныстырып, турнир ережелері түсіндіріліп, қонақтар құттықтады. Ашылу рәсімінен кейін футбол ойындарының іріктеу кезеңі басталды.
Ашылу салтанатына елімізге белгілі спорт саңлақтары мен қала депутаттары Серік Жаманқұлов, Бектияр Бақытов, Ермахан Ибраимов, Серік Есматов қатысты.
«Жастарға сәттілік! Дәл осындай іс-шараның бастау алғанына ерекше қуанып тұрмын. Ойыншыларды өз тарапымнан қолдауға және үздік өнер көрсеткен жастарды құрамаларға ұсынуға дайынмын», – деді халықаралық спорт шебері Ермахан Ибраимов.
Іс-шараның басты мақсаты – жастар арасында салауатты өмір салтын насихаттау арқылы халық арасында бұқаралық спортқа қатысушылар санын арттыру, спорт саласының үздік жастарын анықтау.
Турнир төрт спорт түрі бойынша өтеді. Олар: футбол, баскетбол, волейбол және киберспорт. Әр ойын бойынша бөлек қаржылай сыйлықтар қарастырылған.
Турнирге өтінім берушілер арасында түрлі санаттағы жастар, атап айтқанда студенттер, базар жастары, жұмысшы жастар, өнерлі жастар, әуесқой ойыншылар және т.б. бар. Турнирге елімізге белгілі спорт шеберлері мен белгілі спорт үздіктері төрелік етеді.
  |
«Мемлекет басшысы Қазақстан халқына жолдауында еліміздегі денсаулық сақтау мәселесіне ерекше тоқталып, ұлт саулығы жақсы болса ғана, қоғам орнықты дамитынын атап өткен еді. Бүгін тек футбол ойындары бойынша барлығы 100-ге жуық өтінім келіп түсті, солардың ішінен 32 команда іріктелді. 32 команданың ішінде ЖОО студенттерінен құралған 14 команда, колледж білім алушыларынан 5 команда, әскери академиядан 2 команда, ал қалған 11-і әуесқой командалардан жинақталды. Жастар тарапынан спорт ойындарына айрықша көңіл бөлуі, қызығушылық танытқаны бізді ерекше қуантты. Одан басқа спорт түрлерінен де 32 команда іріктеліп алынды. Ұйымдастырушылар тарапынан барлық жағдайды жасаймыз, ең бастысы әділ, таза ойын болсын деп тілеймін», - деді «Алматы студенттер Альянсы» КҚ атқарушы директоры Жасұлан Бостандықұлы.
Айта кетейік, әртүрлі санаттағы жастар арасында «ALMA CUP 2022» чемпионаты 8-20 желтоқсан аралығында өтеді. 20 желтоқсан күні салтанатты марапаттау рәсімі жоспарланып отыр.
