НЗМ өкілдерінің AlmaU-ға келуі

Назарбаев Зияткерлік мектептерінің 23 кеңесшісі кәсіби бағдар беру жұмысы бойынша университетпен, атап айтқанда бакалавриат бағдарламасымен және оның инфрақұрылымымен танысу мақсатында AlmaU-ға келді. Білім беру мекемесінің мамандықтары мен бағыттарымен танысу ісі-жоғары сынып оқушыларына әрі қарай жоғары оқу орнында білім алу, университет таңдауда кеңес беру және көмек көрсету мақсатында ұйымдастырылды.

Кездесу 16 ақпанда бейресми жағдайда өтті. Жоғары оқу орнымен танысу кампус бойынша экскурсиядан басталды. Қонақтарға университеттің даму тарихы мен оның құндылығын көрсететін инновациялық мұражайға бару ерекше қызығушылықтарын тудырды. Олар нейромаркетинг зертханасына барды, онда маркетинг пәнінің оқытушысы зертхана туралы және оның қандай мақсатта ашылғандығы жайлы өзі айтып берді; сонымен қатар, Knowledge Building ғимаратының 6 қабатынан көз тартатын қала көрінісі және қабырғадағы ағаштан жасалған "AlmaU-дың Алмасы" келушілерді  бей-жай қалдырмады.

Одан әрі біздің мамандар презентация өткізіп, университет туралы, оның мамандықтары, бағдарламалары, әлеуметтік өмірі жайлы толық мағлұмат беріп, қатысушылардың бірқатар сұрақтарына жауап берді.

 НЗМ және AlmaU көптен бері бір-бірімен тығыз байланыста жұмыс істеуде. Жақында наурыз айының басында AlmaU батыс облыстарға барып, Ашық есік күнін өткізуді жоспарлауда, сол кезде міндетті түрде НЗМ оқушылары үшін де  кәсіптік бағдар жұмысын жүргізетін болады.

Жыл сайын AlmaU-да НЗМ бітірген түлектердің саны айтарлықтай артып келеді. Айта кету керек, олардың көпшілігі Ержан Тәтішев Қоры білім гранттарының жеңімпаздары, мемлекеттік және университеттің ішкі гранттарының иегерлері. Бұл кездесу НЗМ өкілдерін университет өмірімен таныстыруға ғана емес, сонымен қатар алдағы жоспарларды, бірлескен жобаларды талқылауға және кәсіби тәжірибемен алмасуға тамаша мүмкіндік болды.