AlmaU және Ш. Айманов атындағы «Қазақфильм» киностудиясы бірлесіп ашқан Медиа және Кино мектебінің ресми ашылуы

18 мамырда «Қазақфильм» киностудиясында AlmaU-дың жаңа бөлімшесі - Медиа және кино мектебінің ресми ашылуы өтті.

Мектеп 2021 жылы қолжетімді және сапалы білім беру, біліктілікті арттыру және жаңа мамандықтар бойынша кадрлар даярлау, кинематография саласында сұранысқа ие мамандарды дайындау, сондай-ақ, өскелең ұрпақты «Қазақфильм» киностудиясының қызметіне тарту мақсатында құрылған.

Жыл ішінде көптеген айтулы оқиғалар болды: студенттердің алғашқы қабылдауы, жаңа «Digital filmmaking» мамандығы ашылды, AlmaU кампусы іске қосылып, киностудия базасында жабдықталды.

Құттықтау сөздерін Қазақстан Республикасы Мәдениет және спорт комитетінің төрайымы Роза Кәрібжанова білдірді. Алматы қаласы әкімінің орынбасары Әлішер Әбдіқадыров мектептің ашылуы қала өмірі үшін, еліміздің креативті индустриясын дамыту үшін елеулі оқиға екенін атап өтті.

Мектепке деген жылы лебізі мен тілектерін «Қазақфильм» киностудиясының президенті, кинорежиссер Ақан Сатаев білдірді. Ол өз сөзінде «Нәтижесінде студенттердің алдынан ашылған бұл үлкен жол әлемді жақсы жаққа өзгертетін үлкен жетістіктерге жетелейді» деген сенімін білдірді.

AlmaU ректоры Гүлнар Куренкеева мектеп ашу идеясының қалай пайда болғаны туралы айтты. «Қазақфильм» киностудиясы мен AlmaU бірлесе отырып, медиа және кино саласында №1 мектепті жасайды деген үміттемін», - деді университет басшысы.

Осындай айтулы шараның ашылуында AlmaU серіктестері, актерлар, режиссерлер, музыканттар, сондай-ақ барлық қызығушылығын танытқандар жиналды. Сондай-ақ, AlmaU-дың  стратегиялық серіктесі Cintana Education Alliance-тың президенті Рик Шэнгроу мен Шығыс Еуропа және Орталық Азиядағы Cintana Education бөлімінің басшысы Чагры Багчиоглу болды. Олар Arizona State University-дің атынан да құттықтау сөздерін айтты. Қонақтар арасында AlmaU Қамқоршылық кеңесінің мүшесі, International Data Corporation вице-президенті Андрей Беклемишев те болды.

Ресми ашылу салтанатынан кейін барлығы Медиа және кино мектебінің кампусына экскурсия жасауға шақырылды. Экскурсия барысында қонақтар студенттердің оқу аудиториялары және монтаждық студияларымен танысты. Қазақ дәстүрі бойынша, бастама сәтті әрі қуанышты болуы үшін шашу шашылды.

Ресми бөлімнің соңында мереке куәгерлері ашық аспан астындағы фуршетке кірісті. Қонақтар спикерлермен танысып, таза ауада мереке атмосферасын тамашалады. Келген қауым үшін концерт және жанды музыка ұйымдастырылды, онда Марсель, Tengri тобы, Lumos студенттік клубы сияқты әртістер өнер көрсетті. Айта кетейік, мектеп студенттері актерлік шеберліктерін көрсетіп, көрермендер назарына бірқатар сахналық қойылымдар қойды.

Қонақтарға Медиа және кино мектебінің жасалған іс-шаралары туралы бейнеролик көрсетілді. Кинорежиссер Әділхан Ержанов, актер Данияр Алшынов, кинотанушы, өнертану ғылымының докторы Гүлнар Әбікеева және «PR-шы» клубының негізін қалаушы Әсел Қараулова жылы лебіздерін білдірген болатын.

Киностудия көгалында шығармашылық және мерекелік атмосфера орнады. AlmaU Медиа және кино мектебі мен «Қазақфильм» киностудиясы өз саласында үздік атанып, медиа, киноиндустрия тарихында бұрын-соңды болмаған биіктерге жетуіне тілектеспіз!

*AlmaU Медиа және кино мектебі бакалавриат бойынша үш негізгі «Digital Filmmaking», «New Media», «Public Relations» білім беру бағдарламасының мамандарын дайындайды.