AlmaU «Growth of the year» наградасымен марапатталды
НҰР-СҰЛТАН қаласы. ҚАЗАҚПАРАТ - "Астана" халықаралық қаржы орталығының бюросында "II Science Forum: Research Impact" атты екінші ғылыми форумы ашылды- деп хабарлады "ҚазАқпарат" ХАА тілшісі.
Форум жұмысының барысында түрлі салалардағы ғылыми жетістіктері үшін ғалымдарды "Scopus award 2019" атты жалпы ұлттық сыйлықпен марапаттау рәсімі өтті. Сондай-ақ, АХҚО "жылдың үздік аналитикалық жұмысы" байқауының жеңімпаздары марапатталды және үздік сарапшылар анықталды.
"Тәуелсіздік күні қарсаңында біз "Scopus award 2019"сыйлығын тапсыру рәсімін өткіземіз. Кез келген ғалым үшін әріптестерінің мойындауы өте маңызды. Ғалым үшін тек еліміздегі әріптестері ғана емес, бүкіл әлем бойынша әріптестерінің мойындауы маңызды болмақ. Өйткені, бір ғалым өз жұмысында екінші бір ғалымның еңбегін ескеруі өте маңызды болып саналады. Сондықтан да сіздерді осы айтулы оқиғамен құттықтаймын. Үкімет бүгінде ғылымды дамытуға ерекше көңіл бөлуде. Мемлекет басшысы білім мен ғылымды дамытудың 2025 жылға дейінгі мемлекеттік бағдарламасын әзірлеуді тапсырды. Біз ғылымды, жоғары білімді дамытуды жаңа деңгейге шығаруға мүмкіндік беретін бірқатар тұжырымдамалық жаңа шараларды қарастырдық. Академиялық адалдық бойынша үлкен жұмыс бастадық. Ғылымды дамыту үшін бұл өте керек бағыт. Біз бұл қағидаларды -нормативтік-құқықтық құжаттарға – жоғары оқу орындары қызметінің үлгілік ережелеріне енгіздік. Жалпы, мұндай бұйрықтар мен қаулылар қазірдің өзінде қабылдануда, бұл нормалар жұмыс істеп, жүзеге аса бастайды", – деді ғалымдарға марапттар табыс ету барысында ҚР Білім және ғылым министрі А. Аймағамбетов.
Министр соңғы 2 жылда Қазақстанда ғылыми жұмыстардың саны 2 есеге артып, 2019 жылы 19 мыңнан астам ғылыми мақалалар жарияланғандығын атап өтті. Қазақстандық ғалымдардың дәйексөздерінің пайыздық көрсеткіштері де өсті.
"Scopus Award 2019" тапсыру салтанатында AlmaU Президенті Қожахметов Асылбек Базарбайұлына "Growth of the year" номинациясы бойынша диплом салтанатты түрде табыс етілді. Бұл марапат Алматы Менеджмент Университетінің 2019 жылы ҚР-дағы барлық ұйымдар арасында өткен жылмен салыстырғанда "Scopus" деректер қорының басылымдарындағы жарияланымдар саны бойынша ең жоғары нәтиже көрсеткендігін білдіреді. Университет ұжымын шын жүректен құттықтаймыз, одан да биік жетістіктерге жетуіне тілектестік білдіреміз!
Elsevier компаниясының және АХҚО Бюросының ынтымақтастықта ұйымдастырған форумда ғылыми этика, плагиат, мақалалар жазу, ғылыми-зерттеу жұмыстарының нәтижелерін коммерцияландыру және т.б. мәселелер талқыланды.
Дереккөздер: Международное информационное агентство «Kazinform»
