AlmaU КФФ-мен бірлесіп футбол менеджерлеріне арналған білім беру курстарын бастайды

Almaty Management University және Қазақстан футбол федерациясы өзара ынтымақтастық туралы меморандумға қол қойды.

Меморандумның мақсаты – футболды халық арасында насихаттау, сондай-ақ футбол индустриясындағы менеджменттің біліктілігі мен құзыреттілігін арттыру.

Келісім аясында футбол менеджерлеріне арналған білім беру курстары мен бағдарламаларын іске қосу жоспарланған. Оқыту төрт бағдарламадан тұрады, оның біріншісі 2023 жылдың наурыз айында басталады.

Бағдарлама спикерлері: Almaty Management University-нің тәжірибелі оқытушылары, футбол индустриясының мамандары, УЕФА спикерлері және AlmaU мен ҚФФ серіктестері.

«Қазақстан футбол федерациясына біздің бастамамызды қолдағаны үшін алғыс айтқым келеді. Жүйені прогресті қолдайтын «қозғалтқыш» пайда болған кезде ғана өзгертуге болады. Біз нәтижеге бірге қол жеткізе алатынымызға сенімдімін. AlmaU 35 жылдан бері кәсіби кадрларды даярлап, жүйені кәсіби басқаруға көшірді.  Біздің серіктестеріміз Coventry University, Cintana Education, Kedge Business school, Istanbul Bilgi University сияқты танымал, шетелдік университеттер. Оларды біз білім беру курстарын дайындауда спикерлер ретінде тартуды жоспарлап отырмыз. Біз қазақстандық футболды дамыту стратегиясын іске асыру үшін идеяларыңызды қолдауға дайынбыз»,  - деді Гүлнар Күренкеева.

Курсқа қатысқыңыз келсе http://kffcourses.tilda.ws/courses#rec541714699 бойынша өтінім қалдырыңыз.